Tschientaners resumads en skizzas – ils plans da la claustra da Müstair

La claustra da Son Jon a Müstair fa part dal patrimoni mundial da l'UNESCO, cuntegna il ciclus da frescos il pli grond ed il pli bain mantegnì dal temp medieval tempriv e vegn surpassada da la pli veglia tur d'abitar e da defensiun en il spazi alpin insumma; la tur Planta.

Tant dals superlativs. La claustra na furma dentant betg mo in ensemble istoric-cultural excepziunal, mabain è er in conglomerat: bundant 1200 onns èn represchentads qua en las pli differentas furmas. L'istorgia da la claustra na sa preschenta betg sco or d'in cul, mabain è multifara e cumplexa.

Activitads apparentamain lungurusas sco concepir ils plans e registrar minuziusamain las scuvertas ed ils resultats archeologics èn perquai fitg impurtantas per la claustra. Mo grazia a quests documents èsi pussaivel da reconstruir sia istorgia e sia istorgia da perscrutaziun. E tals plans datti blerischems: var 260 skizzas e plans èn vegnids elavurads tranter il 1985 ed il 2017. Ils documents – en il fratemp era digitalisads – èn accessibels tar il Servetsch archeologic dal Grischun e qua sin la pagina-web da la Porta Cultura.