Ditg avant las mesiras da corona – in decret dal 1680 davart la protecziun da malsognas contagiusas

Tgi sa regorda anc da las mesiras cunter corona? La primavaira 2020 han fatschentas, bars, restaurants, perfin baselgias stuì serrar, il traffic sur il cunfin è vegnì limità fermamain. Il Cussegl federal ha per l'emprima giada suenter la Segunda Guerra mundiala puspè regì cun agid dal dretg d'urgenza.

Talas mesiras epidemiologicas n'èn betg stadas novas. Enturn il 1900 ha Tavau dà albiert a var 16 000 giasts da cura. Ils blers vulevan medegiar lur tuberculosa en il clima da muntogna. La lescha pretendeva ch'ins dischinfectava las chombras, cura che novs giasts arrivavan. Tgi che tussiva, dueva far diever d'in «Blauer Heinrich», in spidin.

In bun tant pli drasticas èn stadas las mesiras ch'il stadi precedent dal Grischun, la Republica da las Trais Lias, ha decidì l'avust 1680. Quai mussa in edict che vegn conservà en la Biblioteca chantunala dal Grischun. Tenor quest document èn ils represchentants da las Trais Lias sa cunvegnids da postar al cunfin ina guardia d'epidemias. Tgi che vuleva traversar il cunfin duvrava in'uschenumnada bulletta, in attest da sanadad. Persunas da l'Austria Bassa, da l'Ungaria u da la Saxonia sco era murdieus u vagabunds na pudevan ni entrar ni viagiar tras il pajais. La raschun per questas mesiras? La tema da la pestilenza. E questa tema era enragischada profundamain. Tenor stimaziuns temprivas èn var 20'000 persunas daventadas unfrendas da la pestilenza en il Grischun, e quai sulettamain l'onn 1630 e cun ina populaziun totala da 70'000 persunas.