Eleganta ed a medem temp favuraivla – la punt dal Salginatobel

La punt Wildener en la renumada Viamala: in monument da crap da l’istorgia dal traffic dal 18avel tschientaner tempriv. Il viaduct da la Landwasser en Val d’Alvra: in monument istoric da la Viafier retica construì senza puntanadas l’entschatta dal 20avel tschientaner. La punt Sunniberg en la vischinanza da Claustra: ina punt da via gigantesca e tuttina filigrana ch’è vegnida inaugurada il cumenzament dal 21avel tschientaner.

Precis, il Grischun n’è betg mo in chantun da culms, mabain era da punts. Ina da las punts las pli impressiunantas è schizunt situada lunsch davent dal traffic principal: la punt dal Salginatobel tranter Schiers e Schuders. A l’emprima egliada para la punt dad esser construida d’in sulet toc. La platta dal vial singul s’unescha amez la punt cun l’artg ed era las paucas pitgas s’integreschan perfetgamain en quest ensemble.

La construcziun n’è betg mo reussida dal punct da vista estetic, mabain er ord vista economica: L’artg cun trais scharniers da betun armà e la platta dal vial tschentada sisur furman chaschas chavorgias, cun las qualas l’inschignier Robert Maillart ha pudì spargnar bler betun – ed en consequenza custs. Per il pretsch da 135’000 francs plus 45’000 francs per las puntanadas da Richard Coray ha Robert Maillart creà il 1930 ina capodovra. Ina societad d’inschigniers ha schizunt declerà la punt sco monument mundial – ed ha mess ella sin il medem stgalim sco la Tur d’Eiffel ed il Chanal da Panama.