En la sumbriva da San Murezzan? Puntraschigna l'enviern 1925/26

Natiralmain, Puntraschigna ha in vischin renumà: San Murezzan. Là han lieu il 1928 ed il 1948 ils gieus olimpics d'enviern, là – en l'hotel Kulm – arda gia bler pli baud l'emprima glisch electrica da la Svizra, là pratitgesch'ins gia baud sport da bob e skeleton respectivamain Cresta.

Ma Puntraschigna n'è betg inferiura a San Murezzan. Il lieu sa sviluppa – sa chapescha era pervia da la proximitad al Piz Bernina – gia baud ad in vitg d'alpinissem. E sco ch'il program da sport d'enviern dal 1925/26, che vegn conservà en il Museum Alpin, mussa, ha Puntraschigna era bler auter da porscher.

Gia il december 1925 avran tschintg plazzas da glatsch, la bobera, la pista da glatsch per skeleton e schlieusas, plinavant pon ins giugar curling e hockey a Puntraschigna u er empruvar il skijöring. Tar questa disciplina sa mett'ins sin skis e sa lascha trair da chavals. Forsa basti qua perfin per in'egliada sin la cuntrada muntagnarda...