Festas popularas biblicas – las represchentaziuns da la Passiun a Lumbrein

Represchentaziuns da la Passiun han en il Grischun in gronda tradiziun, surtut en las regiuns rumantschas catolicas. Las pli enconuschentas èn bain quellas da Lumbrein e Sumvitg – betg il davos pervia d'in mortori che sto esser capità durant ina da quellas represchentaziuns

Ma in suenter l'auter: En las represchentaziuns da la Passiun vegn mussada la Passiun da Cristus, e quai cun in grond impundiment, ma era cun grond resun. A Lumbrein sa participava en il 19avel e pli probabel era gia en il 18avel tschientaner bunamain tut la populaziun dal vitg a questas represchentaziuns. Ed il publicum arrivava da lontan per assister a la passiun e mort da Jesus. Era da Sumvitg vegnivan persunas – e pauc pli tard aveva era Sumvitg ina represchentaziun da la Passiun. Tar quella saja dentant l'interpret da Jesus a la crusch vegnì maltractà talmain ch'el è propi mort…

La vardad u betg: Las represchentaziuns da la Passiun èn restadas en la memoria collectiva. Cun gieus en il liber – per exempel a Vella il 2003 – u cun il roman "Passiun" da Gion Deplazes dal 1964 han ins cuntinuà cun la tradiziun. E sin Porta Cultura chatt'ins perfin veglias fotografias da las represchentaziuns da la Passiun a Lumbrein.