La ruina da Haldenstein

Co è quai tgi sa stà da far guardia en ina tur da defensiun senza tualetta e cheminé? Forsa schizunt l’enviern? Respostas a questas dumondas na vegnin nus oz probablamain betg pli a chattar, gia perquai che la lescha da lavur reglescha l’access a tualettas durant il temp da lavur.

En il 12avel tschientaner avevan ils guardians da la fortezza da Haldenstein però quella sort: la tur principala na disponiva betg d’in tal confort. Ella è situada sin in pitschen nas da grip sur il vitg ed era accessibla mo sur in’entrada auta en il terz plaun via il palaz vischin. En la segunda mesadad dal 14avel tschientaner ha il cumplex fortifitgà pers ses spir caracter da defensiun ed è vegnì transfurmà ed amplifitgà ad ina fortezza cun intents d’abitar e da represchentar. Anc enfin il 1695 han ins vivì qua, cartaivlamain lura tuttina cun tualettas. Pli tard, tranter il 1769 ed il 1787, han bovas da crappa destruì la part al sid da la fortezza. Da quel temp devi gia daditg il chastè da Haldenstein pumpus ch’è vegnì construì dal 1544 fin il 1548 giu en il vitg.