Savurs exoticas en in vitg muntagnard – la cultivaziun da tubac a Viano

Tartuffels? Cun quels fan ins oz spezialitads grischunas sco maluns. Ma uschè ditg n'enconuschan ins anc gnanc questa planta en il Grischun: il 1717 è il tartuffel vegnì cultivà per l'emprima giada en il chastè da Marschlins sper Landquart. Qua han ins er experimentà cun autras plantas ch'eran da quel temp anc exoticas: tirc, murers per cultivar larvas da la rasulauna da saida – e tubac.

Ma propi da dretg è il tubac vegnì cultivà en il Puschlav. A partir da l'emprima mesadad dal 19avel tschientaner è la solanacea vegnida cultivada là a l'engronda: enturn il 1860 produciv'ins en la val dal sid grischuna fin 80 tonnas tubac ad onn.

Cun la tgira da las plantas, la racolta e l'elavuraziun dal tubac eran occupadas fin 100 persunas, per gronda part dunnas. Ed il tubac n'è tuttavia betg mo vegnì cultivà en il fund da la val. Quai cumprova tranter auter ina fotografia da l'archiv da l'uniun iSTORIA Poschiavo: il maletg fatg enturn il 1933 mussa la cultivaziun da tubac lunsch sur Brusio en il vitg muntagnard da Viano. La matta sin la fotografia è dal reminent Ilda Monigatti. Ella è creschida si a Viano – ed uschia cun il tubac.