Amez la cuntrada da chastels e bunkers – il sbarrament da l'Alvra

Dad A sco Andeer fin Z sco Zuoz: dapertut en il Grischun datti turs da defensiun e turs d'abitar medievalas. Grazia a lur posiziun marcanta e la moda da construir massiva èn ellas per il solit visiblas lunsch enturn.

Auter che las bundant 300 fortezzas ch'èn vegnidas erigidas curt avant la Segunda Guerra mundiala u durant la guerra sezza: quests stabiliments èn zuppads bain – en la muntogna u en il terren.

Plirs decennis a la lunga ha strusch insatgi remartgà la fortezza situada gist sper la via dal Pass da l'Alvra. Anc damain egliadas han attratg las ovras en las spundas dal grip da tuttas duas varts dal bunker. Quellas èn vegnidas realisadas per proteger il stabiliment che s'extenda sin trais plauns ed è vegnì construì en ina profunditad da passa indesch meters. Ensemen furmavan els in uschenumnà sbarrament per segirar il Grischun Central.

Era sch'il bunker è vegnì construì a moda massiva: il temp ha laschà enavos ses fastizs. L'aua è penetrada, la ruina è sa derasada e la schelira permanenta ha donnegià il stabiliment. Quel ha pudì vegnir salvà mo cun sanaziuns cumplessivas. Per far quellas ha la possessura, la Fundaziun istorica militara da la Val d'Alvra, pudì nizzegiar mo ils mais da stad. Suenter trais stads da lavur intensiva ha ella pudì avrir il 2018 las portas armadas per la publicitad.