Il spavent da las muntognas – in schluppet dal «retg da la Bernina»

Chatschadras e chatschaders e numerus litterats pon be semiar da talas cif-ras: Il roman engiadinais da Jakob Christoph Heer «Der König der Bernina» dal 1900 ha chattà tschientmillis da lecturs, il cudesch tutgava durant in temp tar ils cudeschs legids il pli savens en Germania. Il model per l’erox dal roman patriotic ha Jakob Christoph Heer (1859-1925) chattà en la figura da Gian Marchet Colani (1772-1837). Quest chatschader legendar duai avair schluppettà 2700 chamutschs – ultra da dus urs e dus lufs.

Durant la vita da Gian Marchet Colani aveva la fauna en Engiadina ruaus sulettamain per curt temp: Il chatschader da Chamues-ch vulaiva sa far in’existenza sco pastizier a l’ester, sco tantas Engiadinaisas e tants Engiadinais. Ma en Frantscha ès el s’occupà pli pauc dal metier dultsch che da la ferraria d’armas. Enavos en Engiadina ha el lavurà sco serrer, ustier, guida da muntogna – ed è puspè ì a chatscha, sa chapescha.

In’arma dal chatschader legendar e ferrer d’armas sa chatta oz en il Museum Engiadinais a San Murezzan. I sa tracta d’in schluppet a percussiun che Colani ha creà or da lain da nuscher, fier e mesch e ch’el ha ornà cun la nobla gravura «Colanÿ».