SSVP – Festival la Scarìza. In placat, bleras istorgias

Festival La Scarìza, statti scrit sin il placat alv e nair che vegn magasinà en il Center da documentaziun en la Casa Besta. Rock rumantsch, new wave da Turitg, folk dal Balcan e jazz dal Mesauc – quai è la maschaida da tuns e suns che avessan gì da resunar ils 31 da fanadur fin il 1. d'avust 1987 en il Puschlav. Il purtret sin il placat, in'ovra artistica da Paolo Pola, para d'evocar las vuschs allegraivlas da las notgs dal festival.

Lain dentant anc ina giada turnar a l'entschatta: Tge è La Scarìza insumma?
La Scarìza („sbrinzla“ en il dialect dal Puschlav) era ina publicaziun independenta ch'è naschida amez ils onns 1980 da l'iniziativa d'ina gruppa da student:as giuv:nas da la vallada. Il magazin che cumpareva sis fin otg giadas l'onn tractava temas locals cun ina basa culturala e satirica e sa chapiva sco alternativa frestga e critica en la cuntrada mediala da quel temp. Il project aveva radund 700 abunent:as ed è vegnì undrà il 1987 cun la distincziun per lavur da pressa culturala dal chantun Grischun.

Dasper la lavur redacziunala è la gruppa La Scarìza era s'engaschada per iniziativas culturalas en la regiun, tranter auter per il festival da musica cun il num dal magazin. Ma il festival n'ha mai gì lieu. Mo paucs dis avant l'entschatta da l'occurrenza da musica, tranter ils 18 ed ils 19 da fanadur, hai dà grondas inundaziuns en il Puschlav. Perquai ha il comité d'organisaziun stuì annullar il festival.

Il project redacziunal La Scarìza è ì a fin l'onn 1995, ha dentant laschà enavos fastizs durabels en la vallada. Ses spiert – ina sort clom revoluziunar – para da viver vinavant fin oz en il placat dal festival mai realisà.