Nua che l’electricitad scuntrava la viafier – la staziun da Campocologno

Las lingias da l’Alvra e dal Bernina da la Viafier retica fan part dal Patrimoni mundial da l’UNESCO. Quai na munta sa chapescha betg che mintga staziun dal tren è enconuschenta en l’entir mund. Uschia para era la staziun da Campocologno, ina staziun da cunfin tranter la Svizra e l’Italia, d’esser plitost nunsignifitganta.

Pli baud era Campocologno dentant da renum – e quai sco ina sort center alpin per la producziun d’electricitad. Da qua manava in conduct a distanza fin a Milaun. Ed anc oz datti a Campocologno questa ovra electrica ch’era il 1907, cura ch’ella è vegnida messa en funcziun, la pli ferma ovra idraulica da l’entira Europa.

La viafier e l’ovra idraulica avevan bler da far ina cun l’autra. Quai documentescha tranter auter ina fotografia en l’archiv da l’uniun iStoria ch’è vegnida fatga enturn il 1910. Sin la fotografia èn da vesair il bajetg da la staziun vegl e varsaquants umens serius, sco er ina locomotiva da la lingia dal Bernina da l’emprima generaziun. Gia questa locomotiva na vegniva betg messa en moviment cun vapur, mabain cun electricitad producida en la regiun.