Ina processiun per la fin da la stagiun – la stgargiada da Sent

L’entschatta da la stagiun, la fin da la stagiun – questas periodas enconusch’ins en il Grischun dapi var 150 onns, ellas caracteriseschan il chalender annual turistic. En il chalender annual puril han autras datas giugà tschientaners a la lunga ina rolla impurtanta: la chargiada, il di da mesiras e la stgargiada.

Quant ferm che quests eveniments eran enragischads en il Grischun sa mussa per exempel sin fotografias dal linguist Chasper Pult. Il promotur e perscrutader dal rumantsch ha documentà l’atun 1914 ina stgargiada sur Sent en l’Engiadina Bassa. Il maletg mussa uffants cun bandieras, la scenaria regorda ad ina processiun religiusa.

Impurtanta era la stgargiada tuttavia: Gia il di da mesiras sin l’aut da la stad inditgava la quantitad e la qualitad dals products d’alp. La fin da la stad si d’alp eri lura cler quant chaschiel ch’ins aveva producì en total. Perquai spetgavan tuts vess ch’ils pasters e signuns returnian cun lur facultad, il chaschiel ed ils animals – la stgargiada vegniva damai er inscenada correspundentamain. E cler: Bellas stgargiadas datti er anc oz!