In pictur artist en la stgiradetgna – Andrea Robbi

El era bainstant e derivava d'ina famiglia da pastiziers grischuns che ha fatg sia fortuna a l'ester. El era talentà, aveva studegià a Minca ed a Paris, malegiava a l'autezza dal temp, enconuscheva Giovanni Segantini, Giovanni Giacometti, ils gronds picturs artists da la glisch. El avess damai pudì far carriera, avess gì il talent, ils meds. Ma Andrea Robbi (1864-1945) è sa retratg baud – en la stgiradetgna.

Andrea Robbi aveva 34 onns, cura ch'el ha chalà da malegiar ed ha passentà davent da quel mument sia vita en la chasa paterna stgirentada a Segl. L'emprim ha el abità ensemen cun sia mamma, suenter la mort da quella il 1907 ha el vivì sulet e bandunava la chasa sin il pli anc la notg. Gist a Segl, ch'è stà per il filosof Friedrich Nietzsche (1844-1900), giast regular a Segl, il «pli bel chantunet dal mund».

Andrea Robbi ha laschà enavos pauc dapli ch'ina ovra tempriva. Tranter auter maletgs da cuntradas – ed in autopurtret che mussa il pictur artist da la vart, cun in'egliada disfidanta e tuttina loscha. Il maletg en format traversal ha ina preistorgia: Andrea Robbi aveva duvrà la taila gia en format aut per il purtret d'in um giuven. Cun tuts dus maletgs n'è el dentant betg vegnì a fin. Sco quai ch'el n'è probablamain era betg vegnì a frida cun sia vita.