Trais Lias per la vita – il giubileum da «500 onns Republica da las Trais Lias»
Ils 23 da settember 1524 èn s’unidas las Trais Lias. Quest eveniment e las cundiziuns pli detagliadas davart la reuniun èn documentadas en la Brev da federaziun. Vi da quest document da pergiamina, che vegn magasinà oz en l’Archiv dal stadi dal chantun Grischun, pendan ils sigils da las Trais Lias e quels dals signurs da Razén e da l’avat da Mustér.
La disposiziun la pli impurtanta da la Brev da federaziun prevesa che nagina lia na dastga cumenzar ina guerra senza il consentiment da las autras lias. Plinavant garantescha la Brev da federaziun l’agid ed il sustegn vicendaivel, la protecziun da las vias ed il commerzi liber. En cas dad eventualas dispitas tranter las partenarias d’allianza èn previsas proceduras da mediaziun. Tut quai vegn concludì senza limitaziun temporala «per adina».
La Brev da federaziun è vegnida fatga principalmain da las vischnancas da las Trais Lias. I sa tracta da vischnancas giudizialas cun in’atgna giurisdicziun. Ellas èn damai las partenarias d’allianza dal 1524 per propi, ed ellas han lura era giugà la rolla principala en la Republica da las Trais Lias che ha funcziunà a partir dal 1524 sco stadi independent. Or da la Republica hai per finir dà il chantun Grischun ch’è vegnì integrà en la Svizra.