Draguns, saurs e cumpagnia – in fragment da chavazza dal Corn da Tinizong

Il grond perscrutader da la natira Johann Jakob Scheuchzer è stà persvas enturn il 1700 da l’existenza dad essers singulars en il Grischun: «Quest pajais è talmain plain muntognas e cuvels ch’i fiss bain curius da nun avair qua nagins draguns.»

Fin oz n’han ins chattà naginas restanzas da draguns. Ma fossils d’autras creatiras almain uschè singularas datti insaquants. Per exempel da saurs. Sauropods d’ina lunghezza da sis meters eran en gir avant circa 200 milliuns onns circa là nua ch’i sa chatta oz il Corn da Tinizong. En vischinanza han ins scuvrì plinavant ils fossils d’in saur sgulant e da saurs da rapina che vivevan sin terra. En vischinanza era medemamain en gir in metoposaurus, in saur che viveva en la mar e pareva d’esser in salamander gigantesc. Quai mussa in fragment da chavazza ch’ins ha chattà dal 2009 sper il Corn da Tinizong e che fa oz part da la collecziun dal Museum da la natira dal Grischun a Cuira.

Ma co èn rivadas las restanzas d’in abitant da la mar en muntogna? Curta resposta: Las Alps èn sa furmadas pir avant 90 fin 30 milliuns onns. Avant sumegliava il Grischun dad oz plitost a las Bahamas co ad ina cuntrada alpina.