Cura ch'il rumantsch è trumf – troccas

Troccas è in vegl gieu da chartas grischun. El è perfin pli vegl ch'il Grischun sez. Troccas vegniva numnadamain giugà gia cura ch'il Grischun na tutgava anc betg tar la Svizra e furmava in agen stadi cun il num «Republica da las Trais Lias». Questa republica è sa furmada l'entschatta dal 16avel tschientaner ed ha durà fin il 1798.

Il gieu da troccas è derasà cunzunt en la Surselva. E quai franc gia dapi il 1725. Da quel temp ha la vischnanca da Trun scumandà il gieu da troccas per evitar «canera e scandal». Giugà han ins natiralmain gist tuttina – per regla en quatter en equipas da dus, tut tenor senza discurrer u apunta dad aut, ma lura adina per rumantsch. Cun «tschintschar» infurmeschan las partenarias u ils partenaris in l'auter davart lur cartas. Per ch'ils adversaris na chapeschian betg e possian vegnir cugliunads, dovran ins pleds rumantschs codads.

E co vesa or in gieu da troccas? Forsa sco poker? Na, il gieu è ina varianta veglia dal «tarot». En total datti 78 chartas: quatter colurs cun mintgamai diesch chartas da dumbers e quatter chartas da figuras, vitiers vegnan 21 trumfs, las troccas, ed in nar. La finamira dal gieu èsi da far cun agid da las cartas da figuras sco la regina u cun las troccas dapli puncts che las adversarias ed ils adversaris. E quai funcziuna bain: troccas è anc oz il gieu da chartas preferì en la regiun tranter Cuira e l'Alpsu.