Grotesc e tuttina uman – l’ultim grond maletg da Varlin

«En il decurs dal temp percorsch jau la tendenza masochistica dals intellectuals da sa laschar picturar da mai. Il plaschair malign maina ad adina dapli recumandaziuns, uschia che suenter Frisch arriva bainprest Dürrenmatt», scriva l’artist Varlin dal 1966 en ina curta autobiografia.

En vardad survegn Willy Guggenheim, il num burgais da Varlin, visitas da numerus intellectuals, tranter auter da Max Frisch e Friedrich Dürrenmatt. Bleras visitas vegnan er a Bondo, nua che Varlin, l’artist da Turitg, sa retira pli savens. Sia dunna, Franca Giovanoli, deriva da quest vitg bregagliot, els maridan l’onn 1963. Varlin appreziescha ils indigens a Bondo. Els vegnan purtretads schizunt sin ses ultim maletg monumental cun il titel «La glieud da mes vitg».

Sco in saut dals morts grotesc para il maletg che Varlin creescha enturn il 1975 cun ieli, charvun e fieuter sin dus gronds bategls. Il scolast, la tgirunza da malsauns u il guid da muntogna dal vitg, tut las persunas cumparan quasi sco caricaturas sin il maletg da passa set meters lunghezza. Però: Varlin na fa betg beffas da la glieud da Bondo. Il cuntrari: el mussa plitost las qualitads umanas e la finitad da mintga uman. Il maletg sa chatta en il Museo Ciäsa Granda a Stampa e fa part da l'exposiziun speciala "Varlin – Bondo, la Bregaglia e il mondo".