In vehichel grev cun tracziun simpla – il velo militar

Rapid, Aebi u Schilter: vehichels e maschinas da talas firmas han marcà en il 20avel tschientaner l’agricultura en l’entira Svizra. Grazia ad els han la mecanisaziun e la motorisaziun chattà la via en las regiuns muntagnardas. Tranter ils motors da segar, tractors e transporters hai dentant era dà sur bun nov decennis vehichels che han parì da far frunt a tut il svilup: ils velos robusts da l’Armada svizra.

L’uschenumnà velo normal 04, pli tard enconuschent sco velo d’ordonanza 05, è vegnì producì quasi senza midadas dal 1904 fin il 1988. Ils «chavals d’atschal» nairs possedan sulet in gir e paisan passa 22 kg. Pir il 1993 ha l’armada remplazzà els cun velos a set girs.

Pli baud avevi pia num far ir, gist en las regiuns muntagnardas. Quai ves’ins bain en il museum da fortezza Crestawald che posseda in tal velo d’ordonanza. Il proxim vitg, Sufers, è bain mo dus kilometers davent da la fortezza. Ma per ils 120 meters d’autezza stuess ins – senza pudair midar il gir – bain pedalar pulit ferm.