Chesa Planta Samedan
Il museum d’abiter autentic illa pü granda chesa patriziela in Engiadina
Quaunt nöbel cha tschertas famiglias vivaivan düraunt il 18evel e 19evel tschientiner in Engiadina muossa la Chesa Planta a Samedan scu united d’edifizi ed equipamaint creschieu istoricamaing. La chesa patriziela dal temp baroc nun es be la pü granda chesa privata in Engiadina. Daspö cha l’edifizi es gnieu surdo dal 1943 da las descendentas da la famiglia de Planta a la Fundaziun de Planta Samedan sun las localiteds accessiblas al public in fuorma d’ün museum d’abiter. In sias localiteds es perceptibla la cultura d’abiter da pü bod in üna maniera istoricamaing autentica. La vasta chesa dobla – transfurmeda diversas voutas già in temps istorics – ho subieu grands dans tres üna crudeda da bombas vers la fin da la seguonda guerra mundiela ed es in seguit gnida renoveda illa fuorma dad hoz tres l’architect da Basilea Max Alioth (1883–1968). Hoz serva la sedia anteriura da la schlatta dals Salis-Samedan scu center per lingua e cultura rumauntscha. A vain mantgnida üna granda biblioteca, a vegnan spüerts cuors da lingua ed occurrenzas culturelas. Düraunt la stagiun da sted vegnan inscenos illas localiteds istoricas eir töchs teater ed operas. Il museum muossa üna situaziun d’abiter istorica cumpletta d’üna famiglia nöbla. Ogets particulers sun per exaimpel üna stüva da parada, üna pigna in fuorma da tuor e pittüras sün intevladüra. Tuot ils ogets d’adöver mussos scu eir la biblioteca istorica Salis-Planta sun effectivmaing gnieus compilos e druvos da las famiglias possessuras de Salis e de Planta. La biblioteca rumauntscha cumpiglia traunter oter il relasch parziel dal scriptur Peider Lansel (1863–1943).
Museum Chesa Planta Samedan
Mulins 2
7503 Samedan
Tel. +41 (0)81 852 12 72
Access al catalog da la biblioteca: www.winmedio.net/chesaplanta/
Access a la collecziun da cheramicas: https://ceramica-ch.ch
Access a la collecziun da notas: https://rism.online
Infurmaziuns actualas davart ils temps d'avertura, ils pretschs d'entrada e las visitas guidadas chattais Vus sin la pagina-web da l'instituziun.