Fondazione Garbald

La mesadad dal 19avel tschientaner ha il pèr bregagliot Agostino Garbald (directur da duana) e sia dunna Johanna Garbald-Gredig (patruna da chasa e scriptura sut il pseudonim Silvia Andrea) laschà construir l’architect da renum internaziunal Gottfried Semper lur chasa da famiglia – la villa Garbald – en il vitg da cunfin Castasegna. La famiglia ha vivì prest in tschientaner en quella.

Il 1955 han lur descendents, che n’han betg gì uffants, manà l’ierta culturala ed architectonica da la famiglia Garbald en la Fondazione Garbald creada dad els. Suenter ina revivificaziun il 1997/98 posseda ed administrescha quella ussa tranter auter la villa Semper a Castasegna, ch’è vegnida sanada ils onns 2000 ed amplifitgada cun la tur d’abitar «Roccolo», l’ovra litterara da Johanna Garbald-Gredig alias Silvia Andrea (conservada en l’Archiv dal stadi dal Grischun), il relasch fotografic dad Andrea e Margherita Garbald (conservà en il Museum d’art dal Grischun), la biblioteca da famiglia e la ruina medievala Casnac.

Oz furman las localitads da la villa istorica Semper, ch’è sut protecziun da monuments, e da la tur moderna Roccolo ensemen cun il curtin in spazi da pensar e da lavurar per gruppas e gremis da la scienza, furmaziun, cultura ed economia che tschertgan ruaus, inspiraziun, concentraziun e barat creativ. Per retraites e segiurns da studi pli lungs da persunas singulas stat a disposiziun il studio Cascina, construì a moda subtila en il guaudet da chastognas en la vischinanza da la villa Garbald. Tar quest «spirito» dal center da seminaris da la villa Garbald tutgan er occurrenzas culturalas ed in’exposiziun d’art annuala, deditgada ad artistas ed artists contemporans cun accent sin la fotografia, che vegnan organisadas en collavuraziun cun il Museum d’art dal Grischun. La villa Semper, cun ses frescos revelads en il stil da la pictura illusiunistica, la tur d’abitar Roccolo moderna ed il curtin cun tempra da parc èn averts per il public durant ils mais da stad mintgamai la sonda en il rom d’ina visita guidada.

8 Treffer