Archiv cultural Domat
La memoria da l'istorgia locala da Domat
L'Archiv Cultural Domat ha l'intenziun da conservar, da promover e d'intermediar a moda cumpetenta il bain cultural da Domat. El rimna, conserva e segirescha quel ed intermediescha perditgas da l'istorgia e cultura da la vischnanca. La collecziun cumpiglia documents ed objects da tut il gener che derivan da persunas privatas, uniuns, firmas ed instituziuns. La finamira è era da crear ina rait cun auters archivs ed ulteriuras collecziuns e bibliotecas.
Il public en mira èn la populaziun indigena, persunas novarrivadas e visitadras e visitaders da tut las gruppas da vegliadetgna, commembras e commembers d'instituziuns da furmaziun da la scola primara fin scolas autas, la scienza e perscrutaziun e las medias sco era tut las ulteriuras persunas professiunalas e privatas interessadas al bain cultural.
En l'archiv cultural è er integrà l'uschenumnà Museum da Natè. Quel mussa e tematisescha las mascras particularas da l'entagliader en lain Albert Anton Willi «Natè» (1872-1954). Plinavant vegnan collectads e preschentads objects da la Cumpagnia da mats da Domat, in'uniun cun ritga tradiziun.
Purtadra da l'archiv cultural è in'uniun da dretg privat che vegn da sia vart purtada decisivamain da la vischnanca politica e da la vischnanca burgaisa da Domat.
Kulturarchiv Domat/Ems
Tircal 1
7013 Domat/Ems
Tel. +41 (0)81 517 80 12
Infurmaziuns actualas davart ils temps d'avertura e las visitas guidadas chattais Vus sin la pagina-web da l'instituziun.