Center da la natira Torre Belvedere
Ina tur da panorama e d'exposiziun da Pro Natura, construida il 1882
La Torre Belvedere u «al Castel», sco che las Bregagliottas ed ils Bregagliots numnan la tur, è in center d'infurmaziun da Pro Natura. Ella stat sisum ina serra da grip en il reservat da las avnauns glazialas da Malögia, nua che la pendenza da l'Engiadin'Ota giu en la Val Bregaglia munta a 350 meters. La tur da var 24 meters autezza è vegnida construida enturn il 1882 dal cont beltg Camille de Renesse sco part d'ina residenza privata en furma da chastè che n'è dentant mai vegnida bajegiada a fin. Suenter ch'in incendi aveva destruì las construcziuns annexas da la tur, ha l'organisaziun per la protecziun da la natira Pro Natura pudì cumprar la Torre Belvedere l'onn 1953 e stabilir in territori natiral protegì en ils conturns. En quest reservat datti palids autas, guauds cun tieus alpins ed uschenumnadas avnauns glazialas. Questas foppas en il grip èn sa sviluppadas durant l'ultim temp da glatsch. Sin il Pass dal Malögia existan 36 da questas avnauns glazialas – ina da las pli grondas accumulaziuns en tut l'Europa.
Dapi il 2024 pon ins visitar en la tur l'exposiziun «Alpenvielfalt – Erfahre Biodiversität im Torre Belvedere». L'exposiziun prenda las visitadras ed ils visitaders sin in viadi captivant tras la diversitad da la vita. Sin quatter plauns pon ins experimentar e contemplar il tema da divers puntgs da vista. A la fin spetga ina vista spectaculara sin l'Engiadin'Ota e la Bregaglia, sco era sendas da viandar en il reservat vischin.
Center da la natira Torre Belvedere
Torre Belvedere
7516 Maloja
Tel. +41 (0)81 252 40 39
https://www.pronatura-gr.ch/de/naturzentrum-torre-belvedere
Infurmaziuns actualas davart ils temps d'avertura, ils pretschs d'entrada e las visitas guidadas chattais Vus sin la pagina-web da l'instituziun.