Center da la natira Torre Belvedere

La Torre Belvedere es ün center d’infurmaziun da Pro Natura davart la cuntredgia e la natüra intuorn il Pass dal Malögia. La tuor da var 24 meters otezza es gnida fabricheda circa dal 1882. Il plaun süsom spordscha ün’exposiziun permanenta davart l’istorgia da la cuntredgia dal Pass dal Malögia, süls duos plauns pü bass haun lö exposiziuns temporarias. Da la plattafuorma sülla tuor s’ho üna vista impreschiunanta süll’Engiadin’Ota e la Bergiaglia scu eir sül reservat intuorn ed intuorn. Tal reservat tuochan palüds otas, ün god d’agnieus (tevs alpins) e’ls uschedits mulins da vadret. Tar quels as tratta que da fops aint illa grippa, naschieus düraunt l’ultim temp da glatsch. Tuot in tuot as chatta 36 da quists mulins da vadret sül Pass dal Malögia; que es üna da las pü grandas accumulaziuns in Europa. Üna senda instructiva i’l reservat tematisescha ils mulins da vadret e preschainta rariteds botanicas da la regiun. L’incumbenza da fabricher la Torre Belvedere ho do il cunt belg Camille de Renesse intuorn il 1882. Ella faiva part d’üna residenza privata in fuorma da chastè, chi nun es però mê gnida glivreda. Zieva ün incendi, chi vaiva desdrüt ils annexs da la tuor, ho l’organisaziun per la protecziun da la natüra Pro Natura pudieu cumprer La Torre Belvedere dal 1953 ed installer ün reservat i’ls contuorns. Ill’exposiziun permanenta aint illa tuor vain preschanteda l’istorgia dals ultims 300 milliuns ans da la cuntredgia dal Pass dal Malögia. Ils temas sun la geologia, la geomorfologia e la glaziologia, la flora e fauna e l’umaun.

Center da la natira Torre Belvedere

Torre Belvedere

7516 Maloja

Tel. +41 (0)81 252 40 39

pronatura-gr@pronatura.ch

https://www.pronatura-gr.ch/de/naturzentrum-torre-belvedere

Infurmaziuns actualas davart ils temps d'avertura, ils pretschs d'entrada e las visitas guidadas chattais Vus sin la pagina-web da l'instituziun.