Postkartengalerie KABINETLI

Viagiar cun motivs da cartas postalas en il passà dal Rain Posteriur e vinavant en la Mesolcina.

In'exposiziun privata pitschna, ma preziusa, cun vistas anticas da Valragn e conturn. Las fotografias sin las cartas postalas resp. cartas illustradas cun vistas da Valragn, la Mesolcina ed ils Pass dal San Bernardin e dal Spleia derivan per la pli gronda part da l'emprim terz dal 20avel tschientaner. Valragn resp. las valladas dal Rain Posteriur cun la regiun da la Viamala han in'istorgia da transit e da traffic lunga e variada. Ella tanscha da las vias da sauma mal passablas da pli baud fin a l'A13 dad oz. Ord vista da l'istorgia da la lingua e da la colonisaziun vala il vitg da Valragn sco la pli veglia culegna gualsra documentada dal chantun Grischun. Ils Gualsers da lingua tudestga èn immigrads da la Val Formazza taliana (tud. Pomatt) sur il Pass dal San Bernardin ed han colonisà Valragn Dadens en l'ultim terz dal 13avel tschientaner (documents dal 1274, 1277 e 1296). Il gir «Il mund dad ier», manà d'ina guida u d'in guid, mussa il cuntrast cun il mund dad oz e lascha reviver il mund da noss vitg, dal pass dal San Bernardin, da la Valragn, ma era da sias valladas vischinas (la Mesolcina, la Val Son Pieder, la Val San Giacomo). Grazia a l'istorgia dals pass e l'entretschament economic e famigliar (la tradiziun da sauma, il traffic da posta a chavals) cun las valladas vischinas è la vischinanza vegnida vivida activamain sur plirs tschientaners.

L'exposiziun KABINETLI sa chatta sezza en ina perditga dal temp, numnadamain en il tschaler da la chasa Kabinet che datescha tenor retschertgas dendocronologicas da l'onn 1374. La chasa è ina construcziun da stric ed è vegnida bajegiada var 100 onns suenter l'immigraziun dals Gualsers sur il Pass dal San Bernardin. Suenter è la chasa vegnida «revestgida» cun in mir da crappa rutta d'in mez meter ladezza sco protecziun cunter l'aura ed incendis. Il tschaler ed il «Ställi», nua ch'ils perdavants tegnevan lur biestga manidla, han ins rumì e preparà per l'exposiziun. Quella è vegnida averta ils 20 da settember 2020 cun ina vernissascha.

4 Treffer