Art en la cantina – ils maletgs da paraid en il Museum da fortezza Crestawald

Plantas blauas e naiv rosa. U vatgas cotschnas e muntognas blauas. Tscherts maletgs da la cuntrada creads da Turo Pedretti (1896-1964) paran expressiunistics, las colurs reflecteschan situaziuns e stadis d'anim. Ed adina puspè cumpara en las ovras da Turo Pedretti sia Engiadina amada: durant la marschauna u durant il favugn.

Turo Pedretti sto avair laschà encrescher per l'Engiadina, insumma per la natira e la cuntrada grischuna, cura ch'el ha fatg servetsch activ en la fortezza Crestawald. La vita en il stabiliment sutterran era stretga e monotona. 95 umens lavuravan en squadras en l'implant militar secret sper Sufers, contacts cun il mund exteriur avevan els strusch.

Il cumandant da la fortezza saveva probablamain ch'il stabiliment stretg e trist na rinforzava betg gist la morala da la truppa. Perquai ha el incumbensà Turo Pedretti da concepir la cantina a moda pli plaschaivla. Quai ha l'artist e sutuffizier era fatg. Betg en ina moda expressiunistica, mabain cun scenas d'in mintgadi simpel e rural. Questas scenas vi da las paraids sumeglian in pau pitschnas istorgias. E baininqual schuldà vegn ad avair chattà sasez en quellas.