Bullar – co ch'in simpel utensil confermava la sort

Ils museums regiunals e locals grischuns èn savens pitschens. Quai na vul dentant betg dir ch'els n'hajan betg bler da porscher. Il Museum Gilli a Sufers per exempel, ina maschaida da museum da famiglia e museum local, unescha sin fitg pitschen spazi objects da quatter tschientaners. Il spectrum tanscha dals fermagls d'actas fin al plat da zin.

Tranter ils objects chasans ed agriculs sa chatta er in bul elegant. Il bul, segnà da restanzas da tinta e creà da lain, arom e mesch, confermava ina giada la sort dals umans: cun el vegnivan sigilladas uffizialmain las brevs da pegn.

Dal temp da ses diever n'eri betg nunusità en ils vitgs ch'il president da vischnanca fascheva sia lavur davent da chasa, cunquai ch'i na deva betg ina chasa communala separada. Uschia vegniva quai era fatg en il Museum Gilli odiern che conserva sper il bul anc las brevs da pegn correspundentas. Tals documents laschan dentant mo sminar l'istorgia e la suffrientscha dals umans depauperisads ed indebitads.