Cun blera «italianità» – in café grischun sco pizzaria a Copenhagen

«Die vorzüglichsten Zuckerbäcker auf der ganzen Erde, die man auch in allen grossen Städten inner- und ausserhalb Europas findet, kommen aus Graubünden. Dort haben die Leute, die wir von Mexiko bis Petersburg in grauen Jacken und weissen Schürzen sehen, grosse Steinpaläste.»

Quai ch'in barun scriva enturn il 1850 davart ils pastiziers grischuns, para a prima vista surfatg. Ma sch'ins examinescha in document en l'Archiv cultural Engiadina Bassa a Strada, sent'ins ch'il citat n'è betg mo fantasia. Tar il document sa tracti d'ina carta da tratgas e bavrondas dal Café Stephan à Porta a Copenhagen dal 1915. E lura èsi bainbaud cler: In pastizier da Ftan gestiunescha a Copenhagen in Café ch'è il medem mument ina pizzaria.

Dasper «pizza margherita» datti en il café era «spaghetti diavolo» u «roastbeef Milano», sut «formaggi e dolci» chatt'ins dasper gorgonzola er emmentaler. E Stephan à Porta n'era insumma betg il sulet pastizier grischun a Copenhagen. En la chapitala danaisa cumparan en connex cun la branscha dultscha er ils nums Pleisch, Cloetta, Schucani, Caprez u Gianelli.