Mund da paraulas a San Murezzan – la cronica da chastè da Mili Weber

«Qua stun jau lunschor il meglier sin il mund», ha scrit Friedrich Nietzsche l’onn 1881 davart l’Engiadina. Ultra dal filosof ha la vallada alpina grischuna attratg scripturs sco Hermann Hesse, Thomas Mann u Friedrich Dürrenmatt. En la sumbriva da tals gronds litterats ha ina dunna creà a San Murezzan in’ovra da la vita, en la quala sa transfurman litteratura, pictura e musica en glisch ed amur: Mili Weber (1891-1971).

Creschida si a Bienna, ha Mili Weber frequentà la scola da pictura da Heinrich Knirr a Minca, nua ch’èn vegnids instruids artists sco Paul Klee u il medi da cura Peter Berry II. da San Murezzan. L’onn 1917 è Mili Weber ida a star a San Murezzan. Ses frar Emil ha construì per Mili Weber ina chasa cun laina radunda che l’artista ha transfurmada en in’ovra d’art cumplessiva cun figuras fantasticas. Qua è Mili Weber sa deditgada a la pictura ed a la cumposiziun, qua ha ella gì quità d’in chavrielet domestic – e qua ha l’artista er creà in chastè da poppas. A las abitantas ed als abitants da quest chastè ha ella era gist deditgà ina cronica voluminusa.

La «Chronique du Château Cantate-Dôme Saint-Amour» tematisescha en plirs volums l’istorgia d’ina famiglia da noblia franzosa. Pervi da la scrittira artistica, dals numerus aquarels e da las notas da chanzuns vegn mess a chantun il caracter fictiv da l’istorgia. Ella para d’esser reala pir endretg cur ch’ins contempla il chastè da poppas en la chasa da paraulas da Mili Weber. E quai va bain: La chasa è oz in museum.