Empruvament dultsch – in Café grischun a Breslau

Per raschuns economicas han las Grischunas ed ils Grischuns bandunà durant tschientaners lur dachasa per ir a l'exteriur. Els han lavurà sco spazzachamins, rimnadras da rascha, stuccaturs, vaidrers u mercenaris. Blers han chattà in'existenza e mintgatant era ritgezza en in metier dultsch: la pastizaria.

Cafés grischuns e conditorias hai dà en pliras tschient citads europeicas. La purschida dals pastiziers cumpigliava sper il café e pastizarias er aua minerala, liquors e biera. Co ch'in tal local veseva ora, mussa in stgazi en il Palazzo Castelmur a Stampa: in mosaic da vaider preschenta qua fin en ils pli pitschens detagls l'intern da la conditoria «Barth & Cloetta» a Breslau en Pologna.

Il mosaic da vaider cun ina lunghezza da var in mez meter ed ina profunditad da diesch centimeters ha l'artist silesian Georg Gottlieb Kuhnt stgaffì enturn il 1848. Da quel temp era il num Barth a Breslau gia daditg in num enconuschent: l'Engiadinais ha avert sia emprima conditoria a Breslau enturn il 1830, intgins onns pli tard è el sa mess ensemen cun ses cumpatriot Cloetta. Il mosaic da vaider va dal reminent bain a prà cun il Palazzo Castelmur. Era quel è vegnì erigì d'in pastizier, e perquai datti en il Palazzo er in'exposiziun davart quest metier dultsch.