Tranter duas spezias: il pasler da chasa ed il pasler talian s'inscuntran a Sufers

Il pasler da chasa, u simplamain pasler, chatt'ins bunamain en l'entir mund – danor en l'Italia. Il pasler talian da l'autra vart viva bunamain mo en territoris, nua ch'ins discurra talian. Ils dus utschels sa differenzieschan tras la colur da lur verscha. Quella dal pasler da chasa è grischa e quella dal pasler talian brin da chastogna. Uschiglio datti strusch differenzas: tuttas duas spezias èn suondacultura e colliadas fermamain cun l'uman. Lur gnieus na fan ellas betg pli lunsch davent che 100 meters dal proxim edifizi.

En il Grischun èn las valladas dal sid il dachasa dal pasler talian, entant ch'il Grischun dal Nord tutga tar il territori da derasaziun dal pasler da chasa. Tranteren datti ina zona da transiziun, nua che vivan surtut paslers da chasa, ma nua ch'i dat er adina puspè ibridisaziuns, vul dir che las duas spezias sa cruschan.

La cumprova d'in ibrid tranter in pasler da chasa ed in pasler talian a Valragn mussa cleramain ch'il Grischun è fin oz ina regiun da transiziun, nua che vegnan ensemen il sid ed il nord da l'Europa e nua che na s'inscuntran betg sulettamain culturas e linguas, mabain nua che sa maschaida era la natira.

En collavuraziun cun l'Uffizi da chatscha e pestga dal Grischun