Da mieurs ed umans – u davart ina panera pendenta

Cun charn-portg piglian ins mieurs, di in proverbi tudestg. Ma fitg pretensiusas n’èn mieurs betg. Ellas mangian prest tut quai che sa chatta en chaminada ed insumma quai ch’i dat en in perchasa. En il mender cas pon ils ruiders pitschens era sa nutrir per in temp da palpiri u da lain.

Co ch’ins protegiva pli baud las mangiativas – en spezial il paun – da las mieurs, mussa il museum Nutli Hüschi a Claustra. Qua chatt’ins ina veglia panera pendenta. Questa construcziun è simpla e geniala: damai che mieurs na pon betg raiver si da surfatschas glischas e surpendentas, mettev’ins il paun sin roma da lain ch’era fermada vi d’ina trav che vegniva pendida si verticalmain.

E co faschev’ins paun? Il Grischun n’è gea betg propi enconuschent per sia cultivaziun da granezza. Pli baud vegniva dentant tuttina cultivà ierdi e furment a Claustra. Ed a Claustra devi perfin enturn 20 mulins. Sa mantegnì fin oz è sulet – sco ina sort edifizi annex dal Nutli Hüschi – il mulin da bischens. I vala la paina da visitar quel.