Gigantesca e tuttina filigrana – la punt dal Sunniberg

Ella è relativamain giuvna – ed ha tuttina gia il status d’in monument: la punt dal Sunniberg dasper Claustra. Sumegliant al viaduct da la Landwasser da la Viafier retica fa questa punt ina storta e sumegliant al construct da parada da la lingia da l’Alvra, maina la punt dal Sunniberg directamain en in tunnel. Las duas ovras han dentant ina gronda distanza, era temporala: il viaduct è vegnì avert il 1903 per il traffic da viafier, la punt dal Sunniberg l’onn 2005 per il traffic sin via.

Ma tge precis fa che la punt dal Sunniberg è in monument? D’ina vart avain nus ils aspects da la cultura da construcziun: la punt è bun in mez kilometer lunga, è dentant integrada a moda armonica en la cuntrada dasper Claustra. Sco sculpturas vargan si ils pilasters satigls, sco arpas vesan ora las sugas purtantas tranter las pilonas ed il vial.

Da l’autra vart fan er aspects da la tecnica da construcziun in monument or dad ella: normalmain ston punts a partir d’ina lunghezza da 100 meters vegnir tschentadas uschia che midadas da la lunghezza, per exempel pervia da la temperatura variabla, pon vegnir cumpensadas. La punt dal Sunniberg, construida da l’inschigner da Cuira Christian Menn, na dovra dentant nagins spazis e naginas traversadas dal vial perceptiblas. La storta da la punt absorbescha per uschè da dir las differenzas da lunghezza. La construcziun è pia gartegiada tant esteticamain sco era dal punct da vista tecnic.