Radioscola – il radio rumantsch per la scola

Sur decennis eran ellas d'udir or da "biennophones" brins u auters apparats da radio, mintgatant era directamain en la stanza da scola: las emissiuns da "Radioscola", il radio rumantsch per la scola. Fundà il 1955, ha Radioscola cuntanschì betg be scolaras e scolars, mabain er inqual auter contemporan, eran las emissiuns tematicamain bain fitg differentas.

Accumpagnadas vegnivan las emissiuns da radio d'ina sort gasetta da radioscola. Gia l'emprim quadern mussa la diversitad tematica da Radioscola: i va tant per cristals sco per las funtaunas mineralas da Scuol e Tarasp. En il decurs dals decennis èn ils cuntegns dal radio e da ses quaderns accumpagnants sa sviluppads ad ina sort biblioteca da scola – e quai perfin sur il rom scolastic ora.

Fundatur e persuna marcanta da Radioscola è stà Alfons Maissen. El è s'engaschà sur decennis per la lingua e litteratura rumantscha. Sco magister da la scola chantunala aveva el in sensori didactic che vegniva dabun a las emissiuns ed als quaderns. Radioscola ha emess fin il 1990.