Romantica cun tradiziun – la schlitteda

Skeleton? Scarsolar? Cresta? Bob? A San Murezzan vegnan questas disciplinas sportivas cultivadas dapi blers decennis, intgins svilups èn perfin colliads directamain cun la destinaziun turistica. Cun l’Olympia Bobrun dal 1904 sa chatta la pli veglia bobera natirala dal mund a San Murezzan. Ed il Cresta Run è uschè u uschia unic: sin questa bobera vegn pratitgà cresta, in precursur dal skeleton.

Bler pli plauna, ma gist uschè tradiziunala è la schlitteda. Qua na vai betg per filar – a sesend u giaschend – uschè svelt sco pussaivel giu d’in chanal da glatsch. Qua vai per la giuventetgna e l’amur. Quai mussa per exempel ina fotografia da Jon Feuerstein (1925-2010), fotograf da Scuol, che l’Archiv dal stadi dal chantun Grischun tegna en salv.

Ma tge capita durant uschè ina schlitteda? Las dunnas ed ils umens nunmaridads d’in lieu engiadinais van tradiziunalmain pèr a pèr tras la cuntrada d’enviern – e quai sin bellezza schlittas decoradas che vegnan tratgas da chavals. La finamira è da mangiar, baiver e sautar – e natiralmain duain ins emprender d’enconuscher in l’auter in zic meglier durant il viadi. Per far quai tiran ils umens en in frac e las dunnas in costum. Quai vegn fatg anc oz uschia, era sche las reglas èn s’adattadas in pau al temp.