Tranter glisch e colur en la baselgia San Gaudenzio

Pon ins laschar resunar la glisch? Colurar la stgirezza? E metter l'aua en dialog cun l'architectura?

Cun sia installaziun «Fontana di suono», che stat en las ruinas da la baselgia San Gaudenzio, mussa Pietro Pirelli, in artist dal light art, che precis quai è pussaivel. I sa tracta d'ina ovra d'art conceptuala che exista senza iconografia classica e che sviluppa tuttina in dialog intensiv cun l'istorgia ed il sacral – en in spazi ecclesiastic che s'avra vers il tschiel.

Ina sumeglianta idea sa chatta er en in maletg da Hannes Gruber che aveva ina stretga relaziun cun la Bregaglia. Per el aveva la Bregaglia ina glisch tut speziala ch'el documentava en sias ovras. En questa vallada sa chatta oz er il cabinet d’art, che conserva e mussa sias ovras. En l'ovra d'art da Gruber pon ins vesair in cor ed ina crusch che stattan en il center d'ina structura abstracta che pudess regurdar a la siluetta d'ina baselgia. Differents tuns blaus enzuglian la scena e renvieschan a la fluiditad da l'aua sco er ad ina tscherta spiritualitad.