Stadtarchiv Chur

L’Archiv da la citad da Cuira è il post da documentaziun central davart l’istorgia da la chapitala grischuna. El è vegnì fundà gia durant il temp medieval tardiv e sa chatta dapi passa 550 onns en la chasa municipala istorica amez la citad veglia da Cuira. Pervia da la mancanza da plazza e da problems conservatorics vegn l’Archiv da la citad da Cuira transferì en in edifizi nov visavi la chasa municipala. L’archiv da la citad tegna en salv il material d’archiv uffizial da la citad da Cuira e da las anteriuras vischnancas da la Curt, da Maladers e da Haldenstein che tutgan oz tar Cuira. Er il material d’archiv dals anteriurs circuls politics da Cuira, Churwalden e Scanvetg sa chatta en l’archiv da la citad. Quel rimna ultra da quai intensivamain documents d’uniuns, da firmas e da persunas privatas. Ils effectivs da l’archiv da la citad da Cuira cumpiglian in’istorgia da passa in millenni. Quest temp vegn documentà cun pli che 2'000 meters actas, var 1'500 documents e 80'000 fotografias. Vitiers vegn anc ulteriur material d’archiv. Ils effectivs fan part da l’Inventari svizzer dals bains culturals d’impurtanza naziunala. Uschia han els il medem dretg da protecziun sco monuments architectonics dal rang da la catedrala da Cuira.

Stadtarchiv

Rathaus

Poststrasse 33

7000 Chur

Tel. +41 (0)81 254 41 32

stadtarchiv@chur.ch

https://www.chur.ch/abteilungen/9107

Infurmaziuns actualas davart ils temps d'avertura e las visitas guidadas chattais Vus sin la pagina-web da l'instituziun.