Calorias tenor basegn – il cul da bizochels

Maluns, capuns, bizochels? Questas spezialitads enconusch'ins en il Grischun. Las spaisas substanziusas vegnan perfin preparadas da cuschiniers da renum sco Andreas Caminada. Tuttina han quests trais classichers lur rampigns.

Per far maluns dovr'ins tartuffels grattads, farina ed in zic sal, ma era blera pazienza per embrinir e volver ils tochets da tartuffels. Per far capuns dovr'ins pasta e salsizs, ma er in'abilitad da la detta per enzugliar ils gnocs da pasta en ils fegls d'urtais. E per far bizochels dovr'ins ovs, latg e farina, ma er in utensil da cuschina adattà per prender or ils bizochels che nodan a la surfatscha da l'aua buglienta.

In chaz fiss segiramain util. In'alternativa è il cul da bizochels. Quel chatt'ins en il museum dal vitg da Wiesen perfin en trais differentas grondezzas. Las calorias na duain gea betg arrivar adina en la medema quantitad sin maisa respectivamain en il magun.