Tut auter che trist – ina buttiglietta romana en il Museum dal Stgazi da la catedrala da Cuira

Reliquias e reliquiaris? En il Museum dal Stgazi da la catedrala da Cuira na chatt'ins betg mo objects custaivels da l'istorgia da prest 1600 onns da l'uvestgieu da Cuira, mabain er objects particulars. Reliquias numnan ins las restanzas corporalas u ils objects dals sontgs. E quels vegnan conservads en uschenumnads reliquiaris.

Da quests vaschs custaivels fa part en il Museum dal Stgazi da la catedrala da Cuira er in uschenumnà unguentari. Uschia vegnan numnads pitschens vaschs da vaider u da cheramica. Mintgatant vegnan quests vaschs era numnads buttigliettas da larmas, perquai ch'ins carteva ch'ellas conserveschian las larmas sponsas per ils defuncts. Effectivamain sa tracti d'ina buttiglietta per balsam u essenzas. Empè da pitras larmas cuntegneva ina tala buttiglietta liquids che oduravan bain.

L'unguentari en il Museum dal Stgazi da la catedrala da Cuira consista da vaider ed è stgars nov centimeters aut. Vegnida creada è la buttiglietta probablamain gia en l'emprim tschientaner suenter Cristus. La buttiglietta cun sia parita moderna u perfin atemporala fa endament in flacun da parfum elegant.