Mosaic bregagliot

Cun l'ovra «Mondo di Bregaglia», ch'è vegnida creada ensemen cun las scolaras ed ils scolars da la scola bilingua da Malögia, perscrutescha l'artist DEM las ragischs culturalas da la regiun. L'ovra collia regurdientschas persunalas cun identitad locala e lascha nascher qua tras in mosaic plain colurs.

L'intenziun d'unir las fassettas multifaras da la val en in unic rom vegn er persequitada da la Pro Grigioni Italiano tras l’«Almanacco» istoric. En la secziun da la revista deditgada a la Bregaglia s'uneschan la poesia, l'istorgia ed il temp preschent per manifestar la vivacitad e la diversitad culturala da questa regiun. En il decurs dal temp n'è la Bregaglia dentant betg mo cumparida sin las paginas deditgadas ad ella, mabain – grazia a differentas illustraziuns d'artists enconuschents e colliads cun la val – er sin il frontispizi dal «Almanacco». En quest connex ston ins accentuar il maletg sin la cuverta cun tschintg flurs da tschilendra dad Augusto Giacometti, ch'è vegnì tschernì per la perioda dal 1927 fin il 1930, la cumposiziun viva da Gottardo Segantini che ha ornà las ediziuns tranter 1931 e 1933, sco er dal 1939 fin il 1941 il matg da flurs plain colurs dal pictur Giuseppe Scartezzini, dal qual ils perdavants derivan da la Bregaglia.