Puntraschigna l'enviern 1935 – u co ch'il pèr Golay ha fatg films

L'emprim n'èsi betg dal tut cler, sche la camera mussa ina pel d'elefant rubagliada u fastizs en la naiv. Il titel sur il maletg en alv e nair tradescha alura tuttina anc: «Pontresina – Winter 1935».

Il film da bundant diesch minutas cun differentas scenas dal sport d'enviern ha realisà l'apotecher e maior Charles Golay da Puntraschigna. U meglier ditg: Charles Golay ha dà sco reschissur amatur las instrucziuns – e sia dunna Clara Golay ha filmà las scenas invernalas cun ina camera purtabla. La figlia dal pèr, Ursula Mäxi Golay, sa regorda: «Il bab aveva l'egl per ils buns maletgs, ma il filmar surlaschava el ad auters.»

La Biblioteca chantunala dal Grischun ha digitalisà il film d'enviern dal 1935. Quai che manca èn ils commentaris da Charles Golay davart ses film. Ma quai n'è betg la culpa da la digitalisaziun. Charles Golay commentava ses film «live» durant las represchentaziuns – e quel qua è deplorablamain in film mit.