Transhumanza: in ritual istoric

En sia performance ed installaziun «Transumanza sonora» tematisescha Al Fadhil cun in zain da chauras d'aur in ritual da plirs tschientaners: il passagi stagiunal da muvel, tar il qual ils animals vegnan manads da la val si a l'alp e puspè enavos. In moviment en accordanza cun la natira, accumpagnà dal sun dals zains e renconuschì oz sco patrimoni cultural immaterial. 

Sur generaziuns determinava la transhumanza (economia da pastira da viandar) en Bregaglia il ritmus dals mais pli chauds. Fastizs da questa veglia tradiziun vesan ins en ina fotografia istorica da Fulvio Reto, pseudonim dad Agostino Fasciati, che mussa intginas chauras sisum en las muntognas. Il cuntrast tranter ils pizs cuverts da naiv davostiers ed ils prads populads dals animals davanttiers fa endament, quant stretg che la vita e la lavur dals umans èn colliadas cun il ciclus da la natira: Il luar da la naiv pussibilitescha d'ascender a l'alp, entant ch'il cumenzament da la fradaglia annunzia il return en la val.