Giudiment dal temp antic – tschitschar austras a Cuira

Tge mangian ins en il decurs dal temp a Cuira? Segiramain betg mo capuns u maluns. Il tartuffel – la pli impurtanta ingredienza per far maluns – arriva gea pir a l'entschatta dal 18avel tschientaner en il Grischun. Delicatessas devi natiralmain gia avant – e betg mo regiunalas.

A Tumegl en la Tumleastga mangiavan ils ecclesiastics en il 7avel tschientaner dasper charn-bov era litgivas ed anguillas – quai mussan exchavaziuns archeologicas. Quels peschs n'existivan da quel temp betg en la Tumleastga, quels stuev'ins importar almain da la Val dal Rain.

Anc pli fitg fa surstar quai: Sin il territori da la citad da Cuira dad oz existiva sco ch'ins sa in abitadi roman. Ed en quel han ins chattà – puspè tar exchavaziuns archeologicas – crosas dad austras. Quai munta: Intginas delicatessas han ins gia importà durant l'antica dal lontan. Las austras derivan probablamain da la Mar Mediterrana.