Las distincziuns

Per far ina «mustga» (probablamain dal franzos «mouche»), pia tutgar amez la noda, e far in diescher, ils puncts maximals, dovri en il sport da tir dapli ch’in maun ruassaivel: fitness corporala, fermezza mentala, chapientscha tecnica ed autodisciplina. Tgi che cumprova ses savair vegn recumpensà. Las tiraduras ed ils tiradurs survegnan in cranz, ina distincziun en furma d’ina medaglia. Quella vegn cumplettada cun menziuns d’onur e diploms. Insatge spezial èn ils talers, medemamain medaglias, ch'ins ha pudì duvrar fin il 1885 era sco meds da pajament. Numerusas distincziuns da festas federalas e regiunalas dad onns passads vegnan conservadas oz en differentas instituziuns culturalas.

Ils motivs da las medaglias raquintan adina er in’istorgia: Els na represchentan betg mo il lieu da la festa federala, mabain reflecteschan er il spiert dal temp. Uschia mussan ils talers da las festas federalas da tir dal Grischun differents maletgs: Il 1842 marcheschan vopnas il motiv dals talers ed il 1949 è represchentà sin quels in burgais e tiradur vigurus (il svilup istoric da la festa da tir vegn descritta qua ed en il Lexicon istoric da la Svizra). Sin il taler dal 1985 èn visibels danovamain ils scuts da la vopna grischuna, entant che la medaglia da la medema festa da tir mussa la citad da Cuira.