In dragun sco decoraziun – la chasa Tscharner a Giuvaulta

«Im Herbst han ich vil büecher gläsen und eins gschriben», quai ha Hans Ardüser (1557- ca. 1620) scrit en sia cronica autobiografica da l'onn 1584. Il scolast, poet e pictur grischun ha dentant prestà anc dapli durant quel onn che «leger blers cudeschs e scriver sez in cudesch».

La stad 1584 ha Hans Ardüser malegià in plat da l'ura per il clutger ad Andeer; a Domat ed a Cuira ha el decorà las fatschadas da trais chasas. Tranteren ha el era picturà la fatschada da la chasa Tscharner a Giuvaulta. Anc oz è visibla la moda da malegiar simpla e populara da Hans Ardüser: qua ha el represchentà la Sontga Tschaina e figuras biblicas sco Adam, Eva e Jonas. Ils motivs ils pli fascinants – ed er irritants – sin la chasa Tscharner èn dentant in elefant cun in trumbettist si dies e Son Gieri che cumbatta in dragun.

Danunder saveva Hans Ardüser co ch'in elefant vesa ora? El sez n'ha probablamain mai vesì in tal animal. Ils models ha il lectur diligent probablamain chattà en cudeschs. Ed il dragun? Era da quest animal devi represchentaziuns, plinavant eran ils draguns da quel temp anc fitg preschents en la fantasia dals umans. Sin la chasa Tscharner è il dragun dentant spezial: la cua cun sias stortas ed anzas para d'esser sezza in ornament. Fitg decorativ pia, quest dragun!