L’architectura

La «chasa da café», la «tenda per mangiar e baiver», il «biro dal comité central», il «stan da sajettar» – in’occurrenza gronda cun millis da giasts dovra spazi, infrastructura e blera organisaziun. Gia la Festa federala da tir 1842 a Cuira aveva in’atgna «chasa da café» ch’era probablamain destinada surtut per las aspectaturas, pertge che las dunnas na dastgavan da quel temp anc betg participar al tir. Quel onn ha la festa da tir gì lieu sin la Quaderwiese, en il center da Cuira. Las ediziuns dal 1949, 1985 e 2026 èn vegnidas realisadas sin la plazza da tir Schützenmatte a l’ur da la citad. La plazza da tir al Rossboden a Cuira dispona d’ina veglia e venerabla chasa da tir. Per la festa dal 1949 e 1985 è quella vegnida cumplettada cun edifizis temporars – visibels sin quests plans da project:

Ultra dals stans da sajettar e dals lieus per star da cumpagnia ha probablamain surtut er il pavigliun dals premis (dapli infurmaziuns davart las distincziuns chatt’ins qua) fascinà il 1842 numerusas visitadras e numerus visitaders. Sur l’edifizi imposant tronavan er anc las bandieras da las societads participantas. Il pavigliun neogotic octogonal era stà pensà mo per il diever temporar durant la festa da tir, ma el è restà – probablamain grazia a las stentas da l’inschigner grischun e maister constructur Richard La Nicca – sco pavigliun da curtin sin il Rosenhügel ed è vegnì reutilisà il 1985 per la Festa federala da tir a Cuira. Da quel temp era il pavigliun dentant en in nausch stadi ed è vegnì plazzà en in deposit. Dapi il 2017 pon ins visitar il pavigliun dals premis, restaurà cun quità, sin il Hirschbühl (sper il Rosenhügel) er ordaifer las festas da tir:

Per bleras tiraduras e blers tiradurs èn er ils edifizis militars interessants. Intgins da quels stabiliments en il Grischun èn vegnids transfurmads en museums e pon vegnir visitads oz: